今年對自己嚟講係一信挑戰，因為男友要返澳洲做嘢而我又唔捨得，所以二月我都拋低香港所有，飛咗去同佢一齊。去到異地同屋企人分開、工作都要再搵，諗到頭都痛，好不容易先調整到心態。本來已經有哂心理準備係香港遞咗一次信，但舊公司好好咁都俾我轉兼職，係澳洲work from home咗兩個月，不過到最後都係敵不過疫情，家下我都變成咗失業大軍喇。咁大個女都未試過咁，係有啲唔開心嘅，不過多咗時間煮飯，研究下新菜式，又可以得閒update下個blog，同大家分享下我煮咗啲咩。
上星期行Woolworths發現全隻春雞竟然平過兩塊雞胸肉，見食嚟食去都係燒雞胸肉，所以就買咗隻返去整燒春雞兼比男友驚喜。
呢個食譜非常簡單，只要你屋企有個約28L嘅焗爐，而你又識得切嘢，就可以100%成功率整到呢隻色香味俱全、外脆內嫩嘅燒春雞！正常唔大食，一隻燒春雞可以切開兩人分，加啲薯菜（西蘭花、蕃茄仔、薯仔），咁就成為一頓豐富晚餐。
好多人都會覺得燒春雞好難整得好食唔「鞋」口，其實一啲都唔難，最緊要係一定要塞餡料，咁就可以保持肉質嫩滑咬落juicy。
準備時間：
15分鐘
烹煮時間：
1小時45分鐘
主要材料：
春雞 1隻 （今次我用嘅係一隻手大啲啲嘅雞，約1.3KG）
配菜：
蕃茄仔 10粒
西蘭花 1/2個
紅蘿蔔 1/2條
做餡料（Stuffing）：
洋蔥 1/2個
方包 2塊 （建議用麥包，焗出來肉質會香啲！）
嘉拿/富士蘋果1個
黑椒 1/4茶匙
鹽 1/4茶匙
油 4茶匙檸檬 1/2個 （上碟用）
煮法：
1. 首先預熱焗爐200°C。
2. 準備餡料：將洋蔥、蘋果切粒，再將方包摵碎，加入油及黑椒再全部撈勻。
準備配菜：紅蘿蔔切條，西蘭花切成小塊。
5. 放入已預熱焗爐，焗1小時45分鐘。
正常焗咗差唔多兩個鐘，隻雞表皮會變得金黃（想表皮再金黃啲，可以焗多20分鐘）拎出嚟攤一陣就可以切開上碟。將半個檸檬再切一半，食嘅時候撒啲檸檬汁，酸酸地更開胃！
No comments:
Post a Comment